هنا الزاهد : أقدم شخصية سايكو في مسلسل أنا وهي وأحمد فهمي بطل يغير عليّ زي الأول

حلت هنا الزاهد ضيفة على الإعلامية إنجي علي في حلقة أمس، من برنامج أسرار النجوم، على إذاعة نجوم إف إم، وتحدثت عن أعمالها الجديدة، وأبرز نجاحات مشوارها الفني حتى الآن، وذكريات طفولتها.

وتحدثت عن علاقتها بزوجها أحمد فهمي، وقالت : كان يرد على أي متابع يهاجمني على السوشيال ميديا في البداية لكنه الآن أهدى مما سبق، كما أنه كان أكثر غيرة في فترة الخطوبة، ويشجعني في أعمالي حتى أنه طلب الظهور معى في مسلسل حلوة الدنيا سكر، كضيف شرف لتكون ذكرى بيننا، بشرط إلا يكون أقل مستوى من مسلسلنا الأول الواد سيد الشحات.

وعن أحدث أعمالها مسلسل أنا وهي، قالت : كنت لسه مخلصة النمر واترددت علشان كنت لسه عاملة حاجة مع أحمد حاتم، لكن الورق شدني علشان فيه جزء نفسي وفيه مونودراما، وأحمد حاتم لما بمثل معاه بفرد أوي وبنشتغل على الورق كتير قبل ما ندخل المشهد، وبحب الشغل معاه علشان هو مريح كمان، والمفروض إنه هينزل في الشتا على إحدى المنصات، ولو عجب الناس ممكن نعمل موسم تاني، وأنا عاجبني فكرة المسلسلات القصيرة وفكرة الحواديت داخل مسلسل واحد، لأنه بيدي الفرصة لناس كتير تشتغل كمان الجمهور بيقدر يتابع القصة أكتر لأنها قصيرة ولو فوت قصة بيتابع التانية، وأضافت : بقدم شخصية سايكو وشكلها ولبسها مختلف عني تمامًا.

وعن تعاملها مع الفنان الراحل سمير غانم قالت : إنسان طيب عمره ما ضايق حد، أثناء تصوير مسلسل في اللا لاند، اتأخرت عليهم قوي لأني كنت بسخن بسبب طبيعة مكان التصوير، ولما جيت أصور جه اتطمن عليا، وشالوا كلام ليا في المشهد علشان كنت تعبانة، وكان حنين قوي وفضل يتطمن عليا لآخر اليوم.