حمو بيكا يرد على هجوم رواد السوشيال بسبب تهنئته لطلاب الثانوية العامة : عمري ما أنكرت إنى جاهل
رد حمو بيكا على الانتقادات التي وُجهت له بعد نشره عبر صفحته على فيسبوك نصائح لطلبة الثانوية العامة رغم أنه غير متعلم، وقال حمو فى رده : بتقولوا عني جاهل ومش متعلم، مع إن دي حاجة، أنا عمري ما أنكرتها ولا حتى خبيتها على الناس، ومن يوم ما ربنا كرمني واشتهرت وبقى ليا جمهور.
وأضاف: بس هرجع وأقولكم تاني إنها حاجة ماكنتش بإيدي، أنت بقى يا متعلم، التعليم علمك إنك تقعد تعاير الناس بعيوبها؟ التعليم علمك إنك تفضل تتنمر على خلق الله؟ التعليم علمك إنك مباح ليك الشتيمة في حد هو أقل منك في شيء؟ أكيد لا فمتجيش من ورا شاشة وكيبورد تعمل فيها عم الناصح، وأنت أصلا موركش حاجة تعملها، أنا متعلمتش ومنولتش الشرف الكبير ده، بس اتعلمت حاجات كتير في الدنيا أنت متعلمتهاش لسه.
وأضاف: اتعلمت احترام الكبير والصغير، اتعلمت أشقى وأتعب من صغري، تعلمت إني مغلطش في حد، اتعلمت حاجات كتير جداً في حياتي أنت عمرك ما هتتعلمها طول ما أنت باصص للناس، فكر في كلامك كويس وكومنتاتك كويس قبل ما تكتبها، وقبل ما تقول إنك متعلم افتكر إن في تربية وتعليم يعني التربيه قبل التعليم.
وكان حمو بيكا تعرض لانتقادات كبيرة بعدما هنأ طلاب الثانوية العامة قائلا : ألف مليون مبروك لإخواتي وحبايبي، اللي نجحوا في الثانوية العامة.. وإن شاء الله تحققوا كل أحلامكم، وهارد لك لكل اللي منجحوش قدامكم لسه بدل الفرصة ألف فرصة تعوضوا وتحققوا كل اللي بتتمنوه.
