حلا شيحة : هنيئًا لنقابة الممثلين بشطبي ولم أتقاضى باقي أجري عن فيلم مش أنا
ردت حلا شيحة على تصريحات نقابة المهن التمثيلية، وكثرة الأقاويل التي لاحقتها خلال الساعات الماضية، بعدما أثارت الجدل بتصريحاتها الأخيرة عن كليب أغنية بحبك، الذي جمعها بـ تامر حسني خلال أحداث فيلم مش أنا.
حيث نشرت حلا منذ قليل، صورة تجمعها بابنتها وعلقت عليها قائلة : حابة أشكر كل الناس الجميلة على رسايلهم الجميلة المشجعة .. وحابة أشكر كل الصحافة اللي نشرت فتوى دار الافتاء النهارده اللي موقفي هو نفس موقفها اللي بيوضح إن التمثيل والفن عموما زي اي مهنة في الدنيا حلاله حلال وحرامه حرام .. وأنا لا أحب ان اكون جزء من اي نوع من التطرف سواء باسم الدين او باسم الفن .. ولو نقابة المهن التمثيلية ترفض موقف دار الافتاء الواضح فهنيئا لي بشطبها لعضويتي.
وتابعت : حبي للفن محدش يقدر ينكره ولا يزايد عليه .. انا ماتكلمتش غير عن نفسي وبقدر كل زمايلي .. الزميل الوحيد اللي ذكرته هو اللي الموضوع أصلا متعلق بيه .. وعتابي ليه لحسن ظني بيه .. والعتاب في الملأ عشان الكليب في الملأ.
وأضافت حلا : وبالنسبة للكلام غير اللائق عن الأجر .. كل اللي في المجال شاهدين إني كنت اعتذر عن عدد كبير من الأعمال الفنية وكنت بقبل أجور أقل مما يتناسب معي تعاونا مع صناع العمل .. وأصلا ما استلمتش الجزء الأخير من أجري في الفيلم لما أتأخر نزوله جدا و بدأت أتغير وأصلّح .. لأن بصراحة الكلام عن أجر كبير ضحكني.
واختتمت : أنا فنانة بطبعي ومن صغري وكل اللي يعرفوني عارفين حبي للفن .. ودايما هعبر عن نفسي بمواهبي الفنية لما أحب لكن الجديد اني مش هاعمل كده على حساب اللي أنا مؤمنه بيه بجد جوايا زي ما قولت مؤخرا .. أنا لا أهاجم أحد و لا أحارب أحد ولا أنا أفضل من أحد ولا أنصح أحد قبل ما أنصح نفسي أولاً وكلنا نخطئ مفيش حد معصوم من الخطأ .. وبتمنى الخير دايمًا لكل الناس بما فيهم كل زمايلي وصناع العمل.
