تامر حسنى يرد على حلا شيحة : عمرى ما وعدت وخلفت ومستحيل أرد بطريقتك اللى فيها تجريح واتهامات باطلة
بعد غياب حلا شيحة عن جميع فعاليات فيلم مش أنا، والذي شاركت بطولته أمام تامر حسني، تبرأت حلا من أي مشاهد جمعت بينها وبين تامر، حيث نشرت اليوم عبر موقع إنستجرام رسالة تهاجم من خلالها تامر حسني بعد طرحه لكليب جديد يحتوي على بعض مشاهد من الفيلم، مشددة على إن تامر لم يحترم رغبتها.
فيما جاء رد تامر حسني منذ قليل عبر موقع إنستجرام قائلاً : الحقيقه عمري ما بتخيل إني أدخل في نقاش بالشكل دا مع زميل بحترمه، وكان في بينا كل خير، بما إنك يا حلا كتبت بوست و أشركت الجمهور الكريم معانا بدال ما كنتي تكلميني شخصياً و نتناقش بيني و بينك، فا أنا مضطر أرد هنا برضه.
واستكمل : أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد و أخلف الحقيقه اني إحترمت كلامي معاكي ووعدتك أشيل مشاهد تانيه طلبتيها و شيلتها بالفعل، وشكرتيني عليها ولو حابة تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف، أو كلميه يبعتهالك كلها موجودة، و بعدين الفيلم بقاله ٣ اسابيع في السينمات و الكليب موجود جوه الفيلم، هو بالنسبة لك الحرام إننا ننزل الكليب على اليوتيوب بس إنما الكليب يتشاف جوه السينمات عادي ؟.
وتابع : منطق غريب فعلاً يا حلا وبعدين هو مش أنت اللي مضيتي عقد و تقاضيتي عليه مبلغ كبير عشان الدور دا بعينه؟!، هو مش إنت اللي صورتيه ومثلتيه بنفسك و بمنتهى الرضا ولاّ حد أجبرك؟ وللتوضيح للجمهور الكريم أنا والمخرجة الأستاذة ساره وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا.
وأضاف تامر : أنت للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب، إنما أنت فجأه أختفيتي ومكملتيش تركيب صوتك في الفيلم، ولا جيتي تتصوري عشان أفيش الفيلم أصلًا و مخليتيناش نعرف نعمل أفيش مجمع وبقيتي تقفلي تليفوناتك، وتكنسلي علينا كلنا.
وتابع : وبعدين أي فيلم بيبقى ليه خطة مسبقة في الدعاية وأنتي عارفاها كويس، ووافقتي عليها، ودا كليب رومانسي يعني معقول .. كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل؟.
وأنهى حديثه قائلًا : أنا زعلان منك جداً يا حلا على مفردات البوست بتاعك الغير موفقة، ومستحيل هرد بطريقتك اللي فيها تجريح و اتهامات باطله ليا احترامًا لحاجات كتير يمكن فايتاكي، بس مش هتفوتني وعلى فكرة أنا واثق إنك عارفة إني مستاهلش منك كدا، وهكتفي بالتوضيح دا و ربنا يهدي الجميع و يكتب لك كل الخير اللهم آمين.
