المذيعة لينا شاكر : عشت مع أمي تجربة مرض السرطان وادعوا لي ربنا يخفف عني

كشفت لينا شاكر، المذيعة بقناة نايل لايف عن إصابتها بالسرطان، ونشرت لها صورا جديدة من جلسة تصوير خضعت لها بعد سقوط شعرها، عقب خضوعها لأكثر من جلسة كيماوي، مضيفة أنها نشرت الصور، بعد أن تخطت المرحلة على خير، مطالبة جمهورها وكل متابعيها على السوشيال ميديا باستمرار دعمها.

وقالت لينا عبر صفحتها الشخصية على فيس بوك : أنا عشت مع أمي الله يرحمها تجربة الكانسر بكل حذافيرها وتفاصيلها، من يوم أما اتشخصت ليوم وفاتها، كانوا 11 سنة ونصف، كمية الألم اللي عشته معاها في التجربة دي مرعبة، وكانت دعوتي لربنا إنه يخفف عنها ويقدرني إني أسعدها.. وأكيد كنت بفكر مع نفسي ليه كل ده.

وتابعت : أجريت الفحوصات والتحاليل، واتشخصت وعملت العملية وأخدت الكيماوي، وبعدها الاشعاعي، الحقيقه إن ماخدتش الخبر ده زي بقية الناس، إن صحيح جالي لحظه الانهيار، كانت وأنا بعمل الماموجرام، وماكنتش لسه اتشخصت، بس لأني كنت بدعي ربنا انه ياخذني وانا على رجلي وفي صحتي، وكنت متصورة إنه حيكتبهالي، بس في اللحظة دي زعلت، لأني ابتديت أحس انا داخله على إيه، وفكرني بكل اللي عيشته مع ماما، والحقيقه إني مش عايزه أعيشه تاني مع أي حد عزيز أو غالي عليا.

وكان الإعلامي شريف مدكور، قد أعلن منذ قليل عن دعمه لـ لينا فى حربها ضد المرض القاتل وكتب قائلا : صديقة عمري واختي واللي كانت جنبي في مرضي كل لحظة من أول العملية، لكل جلسات الكيماوي كانت جنبي تقويني وتقولي حتقوم وحترجع زي الحصان وبعدي بسنة يجلها نفس الهدية من ربنا، وكانت في كل لحظة قوية وراضية.. مش عارف أكتب إيه ولا إيه، ربنا يتمم الشفا ليكي ولكل مريض سرطان.